Muqdisho (Bosaso Online) Sida ay xaqiijiyeen ilo lagu kalsoon yahay, Madaxweynaha DFS Xassan Shiikh Maxamuud ayaa amray in xilalka laga qaado afar kamid ah xubnaha maamulkiisa kamidka ahaa, sabab la xariirta sida ay uga falceliyeen digniin amni oo katimi dawladda Mareykanka awgeed.
Xubnaha afarta ah ayaa saddex kamid ah waayeen kasii mid ahaanshaha laanta fulinta ee DF, waxayna digniintii Mareykanka kusifeeyeen mid aan run aheyn, 2 kamid ah ayaa laga saaray liiska golaha wasiiradda, halka wasiirkii Gaashaandhiga loo wareejiyey Wasaaradda Dekeddaha, maadaama ay jireen dalal kale oo doonayay kasii mid ahaanshihiisa golaha.
Gudoomiyihii degmada Kaxda Cabdullaahi Shiikh, oo kamid ahaa taageerayaasha Madaxweynaha, si toos ahna u dhaleeceyey Mareykanka ayaa awgiis isku shaandheyn loogu sameeyey, lagana saaray gudoomiyayaasha degmooyinka gobalka Banaadir.
9kii bishan Maarso, sida ay ilo wareedyo amni xaqiijinayaan Mareykanka ayaa gudbiyey Madaxweyne Xassan Shiikh walaaca ay ka qabaan sida looga falceliyey digniino amni oo ay soo saartay oo ku wajahnaa weeraro argagixiso, waxayna si toos ah ugu sheegeen madaxweynaha in isaga la bartilmaameedsan doono, taas oo maalmo ka dib dhacday.
Xilliga ay soo baxday digniinta Mareykanka – duulimaadyada caalamiga ah ee taga Muqdisho ayaa hakad galay maalmo, iyadoo xogo kale ay muujiyeen in qaar kamid ah dublamaasiyiinta dalal dhowr ah ay isaga baxeen Muqdisho, ayna gaareen Nairobi.
Lix maalmood kahor, kolonyada gaadiidka Madaxweynaha DFS ayaa qarax lagula eegtay Waddada isku xirta Villa Somalia iyo garoonka diyaaradaha Muqdisho, xilli Madaxweynuhu kasoo baxay Madaxtooyada, uuna u socdaalayay degmada Aadan Yabbaal ee gobalka Shabeellaha dhexe.
Tan ayaa abuurtay walaac amni, xilli alshabaab kordhisay dhaqdhaqaaqeeda goballada ku hareeraysan caasimadda, ilaa baro kantarool ay ka sameysteen laamiga xiriiray Muqdisho iyo degmada Afgooye oo 30KM u jirta caasimadda.
Maalin kaddib, hoobiyayaal ayaa lagu garaacay xerada Xalane oo ay degan yihiin dublamaasiyiinta shisheeye iyo xaafadaha dhaca hareeraheeda ayaa lagu garaacay hoobiyayaal. Alshabaab ayaa sheegtay masuuliyadooda.
BOSASO ONLINE
