Boosaaso (Bosaso Online) Dowladda Ingariiska ayaa ku dhawaaqday in ay Puntland ka taageeri doonto howlgalka ciribtirka argagixisada ee Hilaac, kaas oo ciidamada Difaaca Puntland ka wadaan buuraleyda Cal-miskaad ee gobalka Bari.
Safiirka Dowladda UK ee Soomaaliya, Mike Nithavrianakis oo maanta booqday Boosaaso, lana kulmay Madaxweynaha Puntland, Siciid Cabdullaahi Deni ayaa sheegay in dowladdiisu ay caafimaadka iyo dhinacyo kale ka taageeri doonto howlgalka ciribtirka argagixisada ee Puntland.
“Aad bay u fiicnayd inaan maanta Madaxweyne Deni ku soo arko Boosaaso. UK waxay ku taageeri doontaa Hawlgalka Hillaac ee ka dhanka ah Daacish sahay caafimaad iyo waxyaabo kale” ayuu yiri Danjire Mike oo qoraal kooban ku daabacay bartiisa X (Twitter).
Tan ayaa uga dhigan Puntland guul siyaasadeed iyo in ay ka guuleysatay qorshihii DFS, oo dadaal badan gelinaysay in laga hor istaago caalamku si toos ah u taageero howlgalka ciribtirka argagixisada ee Puntland, si gaar ahna loogala macaamilo.
BOSASO ONLINE
