Madaxweynaha Dowladda Federaalka Soomaaliya, Xassan Shiikh Maxamuud iyo wafti uu hoggaaminayo ayaa u amba-baxay dalka Turkiga, kadib casuumaad uu ka helay dhiggiisa Madaxwaynaha Turkiga Mudane Rajab Dayib Erdogaan.
Sida ay sheegtay Madaxtooyada Villa Somalia – Madaxweyne Xassan Shiikh iyo dhiggiisa Turkiga Erdogon ayaa ka wada hadli doona iskaashiga, gaar ahaan dhinacyada milateriga, amniga iyo gulufka dagaal ee ka dhanka ah kooxda argagixisada ah ee Al-Shabaab.
“Inta lagu gudajiro booqashada, Madaxwaynaha Jamhuuriyadda ayaa la kulmi doona dhiggiisa Turkiga, iyaga oo ka wada hadli doona sidii loo sii xoojin lahaa iskaashiga iyo xiriirka soojireenka ah ee ka dhexeeya labada dal, gaar ahaan iskaashiga dhanka militariga, amniga, xoojinta iyo joogtaynta gulufka lagu ciribtirayo Khawaarijta” ayaa lagu yiri qoraalka Villa Somalia.
Socdaalka Madaxweynaha DFS ayaa imaanaya xilli uu shalay isaga soo laabtay degmada Cadalle ee gobalka Shabeellaha Dhexe, iyadoo kooxda alshabaab oo wada is fidinta deegaanada dhaca hareeraha caasimadda ay qabsadeen deegaanka Masaajid Cali Gaduud oo u jira wax ka yar 30-KM, Cadalle oo uu ku sugnaa Madaxweynuhu.
Villa Somalia ayaa intaa ku dartay “Booqashadani ayaa muhiim u ah dadaallada lagu xoojinayo iskaashiga Soomaaliya iyo Türkiye ee lagu ciribtirayo argagixisada, iyadoo dowladda Soomaaliya ay ka go’antahay dagaalka adag ee lagula jirto Khawaarijta si loo xaqiijiyo xasilloonida, nabadda, iyo dib u dhiska dalka.”
Tan iyo 2011kii, Turkida ayaa ahaa waday dhow oo ay leedahay Muqdisho, waxaana ay Ankara ka hirgelisay caasimadda Soomaaliya safaaradooda ugu weyn iyo Taliska Milateri ee ugu balaaran, kaas oo ay ka dhistaan meel ka baxsan dalkooda.
Kumanaan Milateri ah ayaa uu Turkigu u tababaray Soomaaliya, kuwaas oo hadda wajahaya burbur xooggan, kaddib markii si taxadar la,aan ah ay howlgalladooda u maamushay DFS ee uu hoggaamiye MW Xassan Shiikh,
BOSASO ONLINE
