Muqdisho (Bosaso Online) Diyaarad ay leedahay Qaramada Midoobay ayaa shil ku gashay dhabaha diyaaraduhu ku ordaan ee garoonka diyaaradaha Aadan Cadde ee magaalada Muqdisho, kaddib markii ay u bixi waayeen Taayarada hore ee diyaaradda.
Diyaarada oo ku duulaysay UN-684 ayaa sidday 22 kamid ah shaqaalaha Qaramada Midoobay, kuwaas oo laga soo dajiyay diyaarada iyagoo badqaba.
Wararka ayaa sheegaya in duulimaadka diyaaradan uu ku wajahnaa caasimadda KMG ah ee maamul-gobaleedka Koonfur Galbeed, balse cilad ku timid ay saamixi weyday in ay ku degto garoonka diyaaradaha Shaati Gaduud ee Baydhabo, ayna dib ugu soo laabatay magaalada Muqdisho.
Diyaaradaha laga isticmaalo Soomaaliya ayaa ah kuwo duug ah, waxaana tani ay sababtay in ay soo noqnoqdaan shilalka ka dhashay ciladaha ku yimaada. Todobaad kahor diyaarad xamuul oo ay saarnaayeen 4 ruux ayaa ka dhacday deegaanka Jasiira ee duleedka Muqdisho, iyadoo dhicitaankeeda kahor lumisay xiriira garoonka diyaaradaha Muqdisho oo ay ka dagi lahayd.
BOSASO ONLINE
