Garoowe (Bosaso Online) Inta la xaqiijiyay 2 Askari ayaa ku geeryooday, tiro kabadan waa ku dhaawacmeen is rasaaseyn ka dhacday kantaroolka koonfureed ee caasimadda Puntland ee Garoowe.
Is rasaaseynta ayaa dhexmartay Booliska Puntland iyo Askar katirsan ciidamada horey loo oran jiray PSF, balse dhowrkii sano ee lasoo dhaafay aan hoostagin Xukuumadda Puntland, haddana ka mushaar qaata DFS.
War-saxaafadeed kasoo Booliska Puntland ayaa lagu sheegay in is rasaaseynta ay timid kaddib markii Askarta katirsan ciidamada horey loo oran jiray PSF ay damceen in ay Koonfurta Gaalkacyo ka iibiyaan gaari dowladeed oo ah nooca loo yaqaan caasi ah (BAS), ayna kasoo kaxeeysteen magaalada Boosaaso, kaas oo horey ay askartan uga dhaceena xafiiska Hanti-dhowrka Guud ee Dowladda Puntland.
“Ciidanka Booliska Puntland ayaa maanta hawlgal qorsheysan ku qabtay gaari bas ah oo horay looga dhacay Xafiiska Hanti-dhawrka Guud ee Dawladda, kaas oo ay si sharci-darro ah u dhaceen maleeshiyaad isku ekeeysiiyay ciidanka amniga, kuwaa oo horay loo oran jiray PSF.”
“Gaarigan, oo la doonayey in si dhuumaaleysi ah loogu iibiyo Koonfurta Gaalkacyo, ayaa lagu qabtay Koontaroolka Bari ee Garoowe, iyada oo ay ilaalinayey gaari kale oo dabley saarneyd. Markii ay ciidanka amniga isku dayeen in ay gaadiidka joojiyaan, dableydii wadatay ayaa si ula kac ah rasaas ugu furtay ciidanka, taasoo sababtay dhimasho iyo dhaawac.”
Booliska Puntland ayaa sheegay in gacanta ay ku dhigeen kooxdii gaariga wadatay, uuna ku socdo baaritaan, marka uu soo dhammaadana la horkeeni doono sharciga.
“Baaritaan rasmi ah ayaa socda, waxaana dhammaan eedeysanayaasha la hor geyn doonaa sharciga. Booliska Puntland waxay bulshada u caddeynayaan in aysan jiri doonin cid ka sarreysa sharciga, cid kasta oo isku dayda in ay carqaladeyso amniga shacabka ama ay ku takri-fasho awoodda dowladda, si kastaba ha isku qarisatee, lala xisaabtami doono.”
BOSASO ONLINE
