Kooxda Al-Shabaab ayaa weerar ku qaaday Hotel Qaahira oo ku yaalla magaalada Beledweyne ee xarunta gobalka Hiiraan. Weerarka ayaa ku bilowday gaari laga soo buuxiyay walxaha qarxa, waxaana xigay rag hubeysan oo gudaha u galay Hotelka.
Weerarka oo qaatay saacado badan ayaa kooxda Al-Shabaab la beegsatay Hotelka, xilli uu ka socday shir looga hadlayay dagaalka ka dhanka ah Al-Shabaab iyo siddii loo qorin lahaa maleeshiyaad deegaanka ah oo ka xoreeya Al-Shabaab galbeedka Beledweyne, kaas oo u dhexeeyay saraakiil katirsan ciidamada DFS iyo waxgaradka Beesha Gaaljecel.
Weerarka ayaa lagu dilay in kabadan 10 ruux, kuwaas oo ay kamid ahaayeen saraakiil iyo Nabaddoono qeyb ka ahaa shirka.
Ciidamada Dowladda Federaalka Soomaaliya ayaa sheegay in ay soo afjareen weerarka, ayna toogteen maleeshiyaadkii Al-Shabaab weerarka soo qaaday.
Madaxweynihii hore ee Soomaaliya, Shariif Shiikh Axmed ayaa cambaareeyay weerarka, isagoo tilmaamay in uu muujinayo sidda argagixisadu ay cadow ugu yihiin jiritaanka ummadnimo.
“Argagixisadu waa cadow baneystay daadinta dhiiga shacabkeena muslimka ah, iyagoo beegsada birmageydada iyo dadka aan waxba galabsan. Falkaani wuxuu tusaale cad u yahay in argagixisadu aysan xurmo u hayn dhiiga shacabka muslimka ah, xilligaan oo lagu jiro bisha barakeysan ee Ramadaan” ayuu yiri Madaxweyne hore Shariif Shiikh Axmed oo qoraal soo dhigay bartiisa Facebook.
BOSASO ONLINE
