Dowladda Puntland ayaa joojisay canshuurta laga qaado gaadiidka ka imaada dalka Itoobiya, si loo fududeeyo isu socodka gaadiidka iyo ganacsiga labada dhinac.
Waraaq kasoo baxday Wasaaradda Maaliyadda Puntland ayaa lagu wargeliyay dhammaan baraha kantaroollada in si KMG ah loo hakiyay canshuuraha shixnadaha ganacsiga ka imaada xuduudka Itoobiya, gaarka ahaan Dowlad deegaanka Soomaaliya ama ka taga Dekeddaha Boosaaso iyo Garacad.
Tan ayay Wasaaraddu xustay in looga gol-leeyahay xoojinta xiriirka ganacsiga, iyadoo dhinacyada ay khuseyso la faray in ay u hoggaan samaan.
Xoolo fara-badan ayaa ka yimaada deegaanka Soomaalida ee Itoobiya, kuwaas oo laga dhoofiyo Dekeddaha Puntland, halka badeecooyin kala duwan oo ka dega Dekeddaha Boosaaso iyo Garacad ay u gudbaan dhanka deegaanka.
Go’aanka Puntland ayaa kusoo aadaya xilli xiisad u dhexeysa Somaliland iyo Dowlad Deegaanka Soomaalida Itoobiya, ay ka jirto deegaanka Dacawaley oo dirir ku dhexmartay maleeshiyo beeleed kasoo tallaabay dhanka Somaliland iyo ciidanka Liyuu Booliska ee deegaanka Soomaalida.
BOSASO ONLINEÂ
