Gaalkacyo (Bosaso Online) In kabadan 50 ruux ayaa ku geeryooday dagaal arbacadii ka dhacay deegaanka Jiicboor ee galbeedka gobalka Mudug, kaas oo u dhexeeya maleeshiyaad beeleed oo kasoo kala jeeda maamullada Puntland iyo Galmudug.
Dagaalka ayaa socday in kabadan 8 saacadood ayaa la isku adeegsaday hubka noocyadiisa kala duwan. Goobjoogayaal ayaa inoo xaqiijiyay in tirada dhaawaca ay kabadan tahay 65 qof, kuwaas oo la kala gaarsiiyay degmada Goldogob iyo waqooyiga iyo koonfurta magaalada Gaalkacyo.
Bilihii lasoo dhaafay goobaha dirirtu ka dhacday ayaa ahaa aag colaadeed, waxaana la xaqiijiyay in kabadan 300 oo qof lagu dilay dagaaladii u dambeeyay ee ka dhacay deegaanada dhaca galbeedka gobalka Mudug.
Dadaallo ay wadeen maamullada Puntland iyo Galmudug, laguna doonayay joojinta colaadda labada beelood oo salka ku haysa deegaameyn – ayaa guuldareystay. Waxaana jira hub aruursi hor leh oo ay wadaan labada dhinac.
Inta ay socotay colaadda galbeedka gobalka Mudug ayaa lagu dilay dad birma-geydo ah, kuwaas oo ay ugu dambeeyeen weerar maleeshiyaad kasoo jeeda dhanka Galmudug ay ku qaadeen Dugsi ku yaalla deegaanka Teerare, iyadoo ay waxyeello kala duwan ay kasoo gaartay carruur arday ah iyo macallinkii dhigayay Dugsiga oo lagu baranayay Qur’aanka Kariimka ah.
Ganacsato iyo siyaasiyiin kasoo kala jeeda labada beelood ayaa lagu eedeeyay in door weyn ay ku leeyihiin hurinta colaadda galbeedka Mudug.
Gobalka Mudug oo u kala qeybsan Puntland iyo Galmudug ayaa sanadihii u dambeeyay ay kordheen colaaddaha ka aloosan dhulka miyiga ah, kuwaas oo u dhexeeya maleeshiyaad beeleed kasoo kala jeeda Beelaha labada maamul kala dega. Balse, maamullada labada dhinac ayaa ku guuleysatay in dagaalku uusan kusoo faafin magaalada Gaalkacyo oo 2016kii ay ka dhaceen dagaallo culus oo dhexmaray labada maamul, kuwaas oo asal ahaan ka yimid miyiga gobalka.
BOSASO ONLINEÂ
